K0nbit – Yon pwojè pou avni lang Kreyòl la nan teknoloji

K0nbit se yon pwojè louvri (open source) ki fèt ak yon sèl objektif: mete lang kreyòl ayisyen an nan yon plas ki merite l nan mond dijital la. Nou tout konnen lang kreyòl la bèl, rich, e se idantite nou kòm pèp ayisyen. Malerezman, li toujou pa genyen ase prezans sou entènèt ak nan zouti teknoloji yo. Se la K0nbit antre nan jwèt la.

Kisa K0nbit ye?

K0nbit se yon diksyonè dijital kreyòl ayisyen ki fèt pou ede tout moun – ni Ayisyen, ni etranje – konprann epi aprann lang lan. Nou vle bati pi gwo bazdone louvri sou mo ak definisyon kreyòl ayisyen an.
Nan K0nbit, ou ap jwenn:

Definisyon mo yo avèk egzanp pou itilize yo.
Etimoloji pou montre orijin chak mo.
Sinonim ak antonim.
Tradiksyon pou lòt lang.
Pwonnonsyasyon vwa (text-to-speech).
Varyasyon rejyonal sou fason moun di kèk mo.

Tout sa ap fèt avèk èd elèv lengwistik ak espesyalis ki konn lang nan an pwofondè.

Poukisa pwojè sa enpòtan?

K0nbit pa sèlman yon aplikasyon. Li se yon mouvman pou:

Fè kreyòl la plis vizib nan teknoloji.
Ede konpayi entènasyonal, tankou Google oswa Android, entegre kreyòl nan sèvis yo.
Bay kominote ayisyen an zouti modèn pou aprann, anseye, epi devlope lang lan.

Kòm yon pwojè louvri, nenpòt moun ki gen konesans oswa pasyon pou lang lan kapab patisipe, swa pou ajoute nouvo mo, swa pou verifye definisyon yo.

Objektif K0nbit

Nou vle kreye yon espas kote kreyòl pa sèlman egziste kòm yon lang pale, men tou kòm yon lang teknoloji, yon zouti aprantisaj, e yon sous fyète pou jenerasyon kap vini yo.

K0nbit se pa sèlman yon pwojè; se yon kreyasyon kolektif pou onore kilti nou.
Si ou renmen kreyòl, patisipe nan mouvman an!

K0nb1t – Yon pwojè pou avni lang Kreyòl la nan teknoloji.